Pse rritet zjarret në Kosovë?
Policia paralajmëron masa të ashpra ndaj zjarrvënësve dhe këshillon qytetarët të shmangin çdo veprim që mund të shkaktojë zjarr
PRISHTINË — Zjarret në pyje dhe fusha vazhdojnë të jenë një nga problemet më serioze gjatë muajve të verës në Kosovë. Përballë rritjes së rrezikut nga temperaturat e larta dhe thatësia, Policia e Kosovës u ka bërë thirrje qytetarëve të shmangin çdo veprim që mund të shkaktojë zjarr dhe të raportojnë menjëherë tek autoritetet çdo rast të dyshuar të zjarrvënies.
Sipas Policisë, zjarret shkaktojnë dëme të konsiderueshme në pyje dhe toka bujqësore, ndërsa personat që shkaktojnë zjarr, qoftë me dashje apo nga pakujdesia, do të përballen me masa ligjore. Biologia Ferdije Zhushi Etemi ka theksuar se ndezja e zjarreve nuk sjell asnjë përfitim për tokën, përkundrazi, dëmton ekosistemin dhe ul pjellorinë e saj.
Njohësi i çështjeve emergjente, Tahir Ahmeti, ka vlerësuar se faktori njeri mbetet shkaktari kryesor i zjarreve masive, ndërsa temperaturat e larta dhe thatësia favorizojnë përhapjen e tyre. Sipas të dhënave të Policisë së Kosovës, gjatë vitit të kaluar janë regjistruar 227 raste të zjarrvënieve, ndërsa vetëm gjatë këtij viti janë evidentuar 62 raste.
Burim: Telegrafi, https://telegrafi.com/zjarret-ne-kosove-policia-paralajmeron-masa-te-ashpra-ndaj-zjarrvenesve/
— Redaksia ZHURMA