Ku mbetet aktiv zjarri pas 17 vatrave në Maqedoni?

SHKUP — Një vatër zjarri mbetet aktive në komunën e Kumanovës, konkretisht në vendin e quajtur Parmakovi Nivi, ku aktualisht po digjet bar i thatë. Ky është i vetmi zjarr aktiv nga gjashtë vatrat e regjistruara gjatë ditës së sotme, ndërsa pesë të tjerat janë vënë nën kontroll dhe janë shuar plotësisht.

Situata ka qenë kritike gjatë 24 orëve të fundit, me gjithsej 17 zjarre të regjistruara në hapësira të hapura në territorin e Maqedonisë së Veriut. Prej tyre, 16 janë shuar, ndërsa një zjarr në zonën e fshatit Belicë, në komunën e Makedonski Brod, është vendosur nën kontroll nga shërbimet e emergjencës.

Drejtor i Drejtorisë për Menaxhim me Kriza, Stojançe Angelov, deklaron se zjarri që përfshiu komunën e Shtipit ishte veçanërisht i rëndë në pyllin me pisha. Ai thekson se ekzistoi rreziku që i gjithë qyteti të mbetet pa ujë të pijshëm, pasi zjarri kërcënonte ujësjellësin, por ndërhyrja e zjarrfikësve dhe dy Air Traktorëve e lokalizuan atë në kohë.

Angelov vëreh se sezoni i zjarreve këtë vit filloi shumë herët, gjë që i detyroi autoritetet të shpallnin gjendjen e krizës që më 1 korrik. Ky organizim i hershëm i qeverisë mundësoi ballafaqimin më të lehtë me vatrat, ndonëse dëmet e shënuara në zonën e Shtipit mbeten të konsiderueshme për shkak të temperaturave ekstreme.

Kjo krizë reflekton një tendencë më të gjerë në Evropën Jugore, ku temperaturat e larta dhe thatësira kanë shkatërruar mbi 19.000 hektarë tokë. Zjarre të mëdha kanë detyruar evakuime masive në vende si Greqia, Kroacia, Shqipëria dhe Franca, ku pranë Perpinjanit u evakuuan mbi 10.000 banorë, ndërsa meteorologët paralajmërojnë për një valë të re të nxehtës deri në fundjavë.

Burim: Alsat-M
— Redaksia ZHURMA