Zjarr nga eskavatori në Kus, arrestohet 29-vjeçari për dëmtim mjeti
50-vjeçari që drejtonte eskavatorin dyshohet se ka këputur telin e tensionit, duke shkaktuar zjarrin që dogji ullishten e familjes Musteqja.
TIRANË — Një konflikt i shkaktuar nga një zjarr gjatë punimeve me eskavator në fshatin Kus të Tiranës çoi në arrestimin e 29-vjeçarit Ledjan Musteqja, të akuzuar për dëmtimin e automjetit dhe të pajisjes GPS të kompanisë që kryente punimet, ndërsa një 50-vjeçar, që po punonte me eskavatorin, po hetohet në gjendje të lirë.
50-vjeçari dyshohet se ka këputur një tel të tensionit të mesëm gjatë kësaj pune. Zjarri i shkaktuar prej kësaj është përhapur në shkurre dhe në një ullishte në pronësi të familjes së 29-vjeçarit.
Sipas policisë, pas incidentit Ledjan Musteqja dyshohet se ka dëmtuar automjetin e kompanisë që po kryente punimet, si dhe pajisjen GPS të instaluar në të — veprim për të cilin u vu në pranga.
Materialet procedurale i janë referuar Prokurorisë së Tiranës për vijimin e hetimeve dhe sqarimin e plotë të rrethanave të ngjarjes.
Burim: BalkanWeb
— Redaksia ZHURMA