LVV fiton ulësen e 50-të në Kuvendin e Kosovës
Si po ndikon vazhdimi i numërimit në ndarjen e mandateve për partitë parlamentare?
PRISHTINË — Lëvizja Vetëvendosje ka arritur të sigurojë ulësen e 50-të në Kuvendin e Kosovës, teksa procesi i numërimit të votave po vazhdon ende. Sipas të dhënave zyrtare nga Komisioni Qendror i Zgjedhjeve (KQZ), deri më tani janë numëruar 2,458 nga gjithsej 2,691 vendvotime, ku përfshihen edhe ato në përfaqësi diplomatike.
LVV-ja aktualisht ka kaluar mbi 300 mijë vota apo 43.65 për qind të votave të numëruara, duke siguruar 50 ulëse në Kuvend. Në anën tjetër, Partia Demokratike e Kosovës (PDK) tashmë ka 23 ulëse, gjë që shënon një mandat më pak sesa shifrat preliminare.
Ndërkohë, Lidhja Demokratike e Kosovës (LDK) vazhdon të ketë 19 ulëse, që po ashtu është një më pak sesa në rezultatet preliminare, ndërsa Aleanca për Ardhmërinë e Kosovës (AAK) vazhdon të ketë tetë ulëse. Sa i përket votave brenda vendit, vetëm në Prishtinë nuk ka përfunduar ende numërimi.
Në kryeqytet kanë mbetur edhe 73 vendvotime për t'u numëruar për të përmbyllur procesin lokal. Ndërkohë, në përfaqësitë diplomatike janë numëruar 33 nga 47 vendvotime, ndërsa mbeten pa u numëruar edhe mbi 100 mijë vota të dërguara përmes postës nga mërgata.
Burim: Koha.net
— Redaksia ZHURMA