Veliaj tërheq delegimin e kompetencave të Anuela Ristanit

Kryetari i Bashkisë së Tiranës, Erion Veliaj, ka vendosur të shkarkojë Anuela Ristanin nga detyra e kryetares së komanduar të institucionit. Lajmi u konfirmua nga gazetarja Klodiana Lala për BalkanWeb.

Vendimi, i firmosur nga vetë Veliaj, bazohet në ligjin “Për vetëqeverisjen vendore” dhe Kodin e Procedurave Administrative. Në të argumentohet se delegimi i kompetencave, i dhënë në shkurt të vitit 2025, ishte një masë e përkohshme për të garantuar vijimësinë e administratës dhe shërbimeve të Bashkisë.

Veliaj pretendon se gjatë periudhës së fundit ka pasur mungesë informimi, moszbatim të vendimeve gjyqësore dhe refuzim të urdhrave të tij të drejtpërdrejtë. Sipas tij, kjo ka cenuar zinxhirin e përgjegjësisë dhe drejtimit institucional, duke e kthyer delegimin në pengesë për ushtrimin efektiv të mandatit të tij.

Megjithatë, sipas burimeve, Ristani do të vijojë të jetë nënkryetare e bashkisë edhe pas këtij vendimi.