Pasagjeri vdes në fluturimin Xheda–Gjenevë, ekuipazhi e vendos pranë një të riu
Si u trajtua trupi i një pasagjeri të vdekur në një fluturim të kompanisë Saudia drejt Zvicrës?
GJENEVË — Një fluturim i kompanisë Saudia nga Xheda drejt Gjenevës u kthye në përvojë tronditëse për një pasagjer 30-vjeçar nga kantoni Vaud, pasi ekuipazhi vendosi një trup të pajetë në ulëset bosh pranë tij për pjesën e mbetur të udhëtimit.
Sipas dëshmisë së tij për mediat zvicerane, transmeton albinfo, udhëtimi i kthimit nga pelegrinazhi në Mekë po zhvillohej normalisht derisa në pjesën e përparme të kabinës u vu re një situatë e pazakontë. Pak më vonë, një pasagjer u kërkua të ndërronte vendin dhe ekuipazhi solli një qese të madhe mortore, të cilën e vendosi në ulëset bosh ngjitur me të.
"E kuptova se bëhej fjalë për një person të vdekur kur një grua pyeti në arabisht nëse kishte një të ndjerë në qese", ka treguar ai.
Personi që humbi jetën ishte një burrë nga Lioni i Francës, i cili vuante nga një sëmundje e rëndë dhe kishte realizuar dëshirën për të kryer pelegrinazhin në Mekë para vdekjes. Në avion ndodhej edhe një i afërm i tij, i cili u ngushëllua nga pasagjerë të tjerë dhe një imam gjatë fluturimit.
Pas uljes në aeroportin e Gjenevës, hynë policia dhe ekipet e emergjencës. Pasagjerët u urdhëruan të qëndronin në vendet e tyre derisa mjekët të konfirmonin se bëhej fjalë për një vdekje natyrore, më pas u lejuan të largoheshin.
Burim: Gazeta Express
— Redaksia ZHURMA