Kush janë studentët shqiptarë që ndërtojnë identitetin midis dy botëve në Lozanë?

— Në Universitetin e Lozanës, një nga institucionet më prestigjioze të arsimit të lartë në Zvicër, studiojnë dhjetëra të rinj shqiptarë nga Kosova, Maqedonia e Veriut, Lugina e Preshevës, por edhe të lindur e të rritur në Zvicër. Për të parët, sfidë mbetet përshtatja me një realitet të ri akademik dhe shoqëror; për brezin e dytë dhe të tretë, dilema shpesh nuk është integrimi, por ruajtja e gjuhës, kujtesës kulturore dhe ndjenjës së përkatësisë në një mjedis ku identiteti ndërtohet mes dy kulturave. Për disa kjo përbën një avantazh të rëndësishëm social e profesional; për të tjerë mbetet një sfidë e vazhdueshme për të ruajtur lidhjen me origjinën pa u shkëputur nga shoqëria ku jetojnë.

Studentët shqiptarë në Lozanë i përballen sfidave të ndryshme. Për të trajtuar këtë realitet nga afër, ekipi i albinfo.ch ishte në Lozanë, ku realizoi këtë reportazh me studentë shqiptarë të Universitetit të Lozanës dhe me përfaqësues të Shoqatës së Studentëve Shqiptarë.

Përmes përvojave të tyre personale, ata flasin për jetën studentore në Zvicër, sfidat e integrimit, rolin e organizimit studentor dhe mbi një pyetje që vazhdon të shoqërojë brezat e rinj të diasporës: A ndihen më shumë shqiptarë apo zviceranë?

Identiteti nuk është një kategori statike. Për brezat e rinj të diasporës shqiptare ai ndërtohet, riformësohet dhe vihet vazhdimisht në dialog me shoqërinë ku jetojnë. Pikërisht studentët janë ndër grupet që e përjetojnë më drejtpërdrejt këtë proces, pasi ndërtojnë njëkohësisht formimin akademik, rrjetin profesional dhe përkatësinë e tyre kulturore.

*Burim: Albinfo.ch, https://www.albinfo.ch/studentet-shqiptare-ne-lozane-mes-dy-identiteteve-sfidave-dhe-se-ardhmes/*

*— Redaksia ZHURMA*