Spanja mposht Belgjikën 2-1, kalon në gjysmëfinale

BOTA — Spanja siguroi vendin në gjysmëfinale pas një ndeshjeje plot emocione kundër Belgjikës, duke fituar me rezultatin 2-1. Mikel Merino shënoi golin vendimtar në minutën e 88-të, duke siguruar kualifikimin e iberikëve në fazën tjetër ku priten të takojnë Francën.

Spanja kontrolloi lojën që nga minutat e para me posedimin e topit, por pa arritur të krijojë mundësi masive në fillim. Ruiz u shfaq në momentin e duhur në minutën e 30-të, pas një topi të kthyer nga Courtois, dhe shënoi golin e parë për iberikët, duke i dhënë vrull skuadrës spanjolle në këtë sfidë të rëndësishme.

Yamal, ylli i Barcelonës, bëri disa tentativa të shpeshta, por joefektive, në pjesën e parë. Në minutën e 21-të, ai goditi mjaft mirë nga jashtë zonës, por një devijim minimal ia mohoi golin. Në minutën e 40-të, Yamal bëri dy driblime spektakolare dhe tentoi goditjen në shtyllën e parë, por topi gjeti vetëm rrjetën e jashtme.

Belgjika rezistoi me vendosmëri, veçanërisht falë portierit Thibaut Courtois, i cili arriti të bllokonte shumë tentativa të vështira të Spanjës. Megjithatë, në minutën e 41-të, De Ketelaere u shërbye mirë nga Castagne dhe me kokë shënoi golin e barazimit 1-1, duke rikthyer balancën dhe ndezur shpresa të reja për belgët.

Në pjesën e dytë, Spanja rriti presionin në kërkim të golit vendimtar, ndërsa Belgjika u përqendra në mbrojtje kompakte dhe kontra-sulme të shpejta. Courtois pësoi probleme muskulore në minutën e 71-të dhe la fushën në lot, duke u zëvendësuar nga Lammens në një fazë kritike të ndeshjes.

Drejt fundit të ndeshjes, trajneri spanjoll De La Fuente bëri lëvizjen vendimtare, duke aktivizuar Mikel Merinon në vend të Olmos. Merino përfitoi menjëherë nga një top i kthyer i Lammens në minutën e 88-të dhe gjuajti me forcë nga pranë portës, duke shënuar golin vendimtar 2-1 dhe kualifikimin e Spanjës në gjysmëfinale.

Burim: Top Channel
— Redaksia ZHURMA