Pse i preferon Sllaveski normat e larta interesit ndaj inflacionit?

SHKUP — Guvernatori Trajko Sllaveski mbrojti sot rritjen e normës bazë të interesit në 4,25%, duke argumentuar se norma më të larta për kreditë janë më pak të dëmshme se sa rritja e inflacionit. "Më mirë norma më të larta interesi sesa rritje e inflacionit", u shpreh prerazi ai në konferencë për shtyp.

Sllaveski hodhi poshtë paralajmërimet e tri bankave të mëdha dhe një banke më të vogël për rritje të provizioneve. Banka Popullore, tha ai, "nuk sheh arsye" për këtë hap. Norma e re prej 4,25% — rritur me 0,25 pikë përqindjeje nga 4% — shërben vetëm si sinjal; vendimi afarist mbetet në duart e bankave komerciale.

Efekti i masës zakonisht shfaqet me vonesë. Që nga fillimi i vitit, kërkesa e sektorit korporativ për valuta të huaja ka kushtëzuar prani më të madhe të Bankës Popullore në tregun valutor. Nga fillimi i majit, kjo kërkesë është stabilizuar.

Guvernatori vuri në dukje rreziqet gjeopolitike: pasojat ekonomike të zhvillimeve në Lindjen e Mesme mbeten të pranishme, ndërsa pasiguria për stabilizimin e flukseve ekonomike vazhdon. Projeksionet e reja parashikojnë inflacion të importuar më të lartë dhe rritje të moderuar të çmimeve të energjisë dhe një pjese të produkteve ushqimore.

"Edhe pse normat e ulëta të interesit janë të pëlqyera, ato e nxisin inflacionin dhe kjo i godet më së shumti shtresat më të varfra", theksoi Sllaveski. Pritjet e konsumatorëve për rritje çmimesh janë disi më të moderuara krahasuar me muajin e kaluar, por rreziqet për inflacionin mbeten kryesisht në kahun rritës.

Burim: Tetova Sot
— Redaksia ZHURMA