Sindikata e Universiteteve mbështet studentët, dënon dhunën dhe kërkon dialog

Sindikata e Universiteteve ka shprehur solidaritet me studentët në protestë dhe ka dënuar dhunën e forcave të rendit. Në deklaratën e saj, ajo kërkon vetëpërmbajtje të autoriteteve, respektimin e të drejtave themelore dhe garantimin e së drejtës për protestë paqësore.

Sindikata thekson se përshkallëzimi është pasojë e mungesës së reagimit dhe neglizhimit të kërkesave qytetare nga qeveria dhe politika. Pas 135 ditësh proteste maratone, kërkesat nuk kanë marrë përgjigje. “Mungesa e dialogut dhe e vullnetit për zgjidhje rrezikon të thellojë më tej mosbesimin ndaj institucioneve”, thuhet në deklaratë.

Duke iu referuar protestës para Ministrisë së Arsimit, sindikata shprehet se studentët iu drejtuan institucionit që duhet t'i shërbejë. Ministria është adresuar me shkresë zyrtare që në mars, pa përgjigje. “Heshtja që studentët hasën sot në rrugë është e njëjta heshtje që personeli akademik has prej muajsh në korrespondencën institucionale”, deklaron sindikata.