Sinani: Asnjë shqiptar s'u pranua zjarrfikës në Preshevë e Bujanoc
Kryetarja e Komunës së Preshevës thotë se nga komuna e saj janë pranuar 2 zjarrfikës, por asnjëri prej tyre nuk është shqiptar
PRESHEVË — Kryetarja e Komunës së Preshevës, Ardita Sinani, ka reaguar pas publikimit të rezultateve të konkursit për pranimin e 400 pjesëtarëve të rinj në Shërbimin e Zjarrfikësve në Serbi, duke thënë se asnjë shqiptar nga Presheva dhe Bujanoci nuk është punësuar. Sipas Sinanit, nga Komuna e Preshevës janë pranuar dy zjarrfikës, ndërsa nga Komuna e Bujanocit tre, por asnjëri prej tyre nuk është shqiptar.
Sipas saj, ky është konkursi i disatë me radhë nga ana e Ministrisë së Punëve të Brendshme të Serbisë, në të cilin kandidatët shqiptarë shpërfillen totalisht. Sinani vlerëson se praktika e tillë përbën shkelje të të drejtave të pakicave dhe të drejtave themelore të njeriut, duke e lidhur atë edhe me konkurset e mëparshme për punësim në Policinë e Serbisë.
Sinani ka theksuar se situata është veçanërisht shqetësuese pasi, sipas saj, bëhet fjalë për dy komuna me shumicë shqiptare, ku përfaqësimi i shqiptarëve në institucionet shtetërore vazhdon të mbetet i ulët.
Burim: Telegrafi, https://telegrafi.com/sinani-diskriminim-asnje-shqiptar-nuk-u-pranua-ne-konkursin-per-zjarrfikes-ne-presheve-dhe-bujanoc/
— Redaksia ZHURMA