Si u arratis Orijol Rukaj nga funerali i vëllait në Melburn?
Shqiptari i akuzuar për trafik droge dyshohet se u ndihmua nga bashkëpunëtorë për t'u larguar me një Toyota Land Cruiser pas ceremonisë.
MELBURN — Autoritetet australiane po vazhdojnë kërkimet për shqiptarin Orijol Rukaj, i cili u arratis gjashtë javë më parë gjatë funeralit të vëllait të tij në Melburn. 47-vjeçari ndodhej në paraburgim për trafikim të lëndëve narkotike, por u zhduk në mënyrë spektakolare.
Rukaj ishte lejuar nga autoritetet kompetente të merrte pjesë në ceremoninë mortore ku ishin mbledhur rreth 300 persona. Ai u shoqërua nga punonjësit korrektues dhe madje u lejua të vepronte si mbajtës i arkivolit të vëllait të tij.
Pas ceremonisë, ai thjesht u zhduk. Hetuesit dyshojnë se shqiptari u largua me një automjet tip Toyota Land Cruiser me ngjyrë të errët që e priste pranë varrezave, i ndihmuar nga persona të tjerë për arratisjen.
Oficerët humbën kontaktin vizual me të për shkak të numrit të madh të pjesëmarrësve. Policia ka kontrolluar rreth 20 adresa në Melburn ku dyshohet se ai po fshihet, ndërsa disa bashkëpunëtorë të tij dyshohet se ndodhen jashtë Australisë.
Gjatë hetimeve, një person u ndalua në aeroport por u lirua pa akuzë. Rukaj përshkruhet si një burrë me trup të hollë, rreth 1.76 metra i gjatë, me sy kafë, flokë të shkurtër kafe, dhe i veshur me kostum të zi e atlete sportive.
Burim: Insajderi
— Redaksia ZHURMA