Si po e afron Rama Shqipërinë me Izraelin
Ministri i jashtëm i Izraelit vizitoi Tiranën, ndërsa vijojnë zhvillimet rreth tezës së Shqipërisë si atdhe rezervë për hebrenjtë dhe projektit të muzeut në Vlorë.
Redaksia ZHURMA · · 1 min lexim
Pas deklaratave të ish-sekretarit të shtetit Anthony Blinken në Tiranë, ministri i jashtëm i Izraelit, Gideon Sa'ar, u bë diplomati i dytë i lartë që vizitoi kryeqytetin shqiptar. Vizita vjen në një kohë kur marrëdhëniet mes dy vendeve janë gjallëruar përmes nismave të ndryshme dhe vendimeve të ndërmarra nga kryeministri.
Teza e Shqipërisë si «një atdhe rezervë për hebrenjtë» u hodh për herë të parë në mars 2018 nga kryeministri gjatë një ceremonie në Shtëpinë e Bardhë, ku ai u nderua për kontributin në ruajtjen e kujtesës së Holokaustit. Më vonë, në 12 shtator 2024, gjatë vizitës së presidentit izraelit Herzog në Tiranë, u fol për lidhjen mes dy vendeve, bashkëpunimin ekonomik dhe mirëpritjen e turistëve, sipërmarrësve dhe profesionistëve izraelitë. Kjo tezë u përsërit nga kryeministri edhe në Izrael në 24 tetor 2024, duke theksuar mundësinë e një atdheu të dytë për hebrenjtë.
Në kuadër të këtyre zhvillimeve, qeveria ka parashikuar fonde prej 6.5 milionë eurosh për ngritjen e Muzeut hebraik në Vlorë, një projekt që ka sjellë polemika, ndërkohë që ngrihen pikëpyetje mbi qasjen ndaj kujtesës historike dhe hapjen e rrugës për marrëveshje e kompani izraelite në vend.
