Si po dëmtohen të drejtat e qytetarëve nga kriza institucionale?

PRISHTINË — Kosova po vazhdon të funksionojë për vitin e dytë radhazi pa institucione të plota, si pasojë e zgjedhjeve të përsëritura. Avokati i Popullit, Naim Qelaj, shprehu shqetësim se kjo krizë institucionale po cenon drejtpërdrejt të drejtat e njeriut, për shkak të ngecjes në nismat legjislative, dhe po krijon pasiguri te qytetarët për zhvillimet e ardhshme në vend.

"Mungesa e krijimit të institucioneve cenon dhe ndikon shumë keq tek të drejtat e njeriut," tha Qelaj, duke paralajmëruar se këto kushte po ngadalësojnë edhe ndryshimin e ligjeve dhe nxjerrjen e ligjeve të reja që ndikojnë në mirëqenien dhe standardin e jetës së qytetarëve.

Sipas Avokatit të Popullit, kriza institucionale po shkakton edhe kufizime buxhetore dhe ngecje në projektet infrastrukturore. Ai theksoi se një nga parimet themelore të reformës në drejtësi duhet të jetë respektimi i ndarjes së pushteteve, dhe ngriti shqetësime për tendencat e ndërhyrjes në sistemin e drejtësisë, duke kërkuar që politika dhe ekzekutivi të qëndrojnë larg ndikimit në gjyqësor dhe prokurori.

Qelaj njoftoi se një numër institutesh funksionojnë me mandate të vazhduara, përfshirë edhe institucionin e Avokatit të Popullit vetë, ndërsa institucione të tjera mbeten në "dinamikë shumë të ulët të angazhimit" dhe nuk arrijnë të plotësojnë projektet e tyre.

Vazhdimi i krizave politike dhe institucionale do ta thellonte edhe më shumë dëmin për vendin, paralajmëroi Qelaj.

Zgjedhjet më të fundit në Kosovë u mbajtën më 7 qershor, ku fituese doli Lëvizja Vetëvendosje. Megjithatë, Komisioni Qendror i Zgjedhjeve nuk ka certifikuar ende rezultatet, ndërsa ankesa të kandidatëve për deputet janë depozituar në Gjykatën Supreme.

Zgjedhjet paraardhëse ishin mbajtur më 28 dhjetor dhe 9 shkurt, ku LVV-ja doli po ashtu fituese, por pa arritur marrëveshje për zgjedhjen e presidentit pas raundit të dhjetorit.

Kreu i LVV-së, Albin Kurti, tha se pasi përfundojnë proceset e certifikimit do të komunikojë me partitë politike për të arritur marrëveshje mbi formimin e institucioneve dhe zgjedhjen e presidentit të Kosovës.

Burim: Portali Dukagjini
— Redaksia ZHURMA