Si ndërthuri Bajroni kulturën shqiptare në skenën e Londrës?
Ansambli Kombëtar i Këngëve dhe Valleve u prezantua në Londër për herë të parë pas rënies së komunizmit, në një produksion të frymëzuar nga Bajroni.
LONDËR — "Shqipëria përmes syve të Bajronit" u prezantua në Londër si produksion etno-muzikor dhe teatror që ndërthurte historinë, poezinë, muzikën dhe trashëgiminë shqiptare. Aktiviteti u organizua nga Empowered Women of Diaspora, në partneritet me British Albanian Youth & Culture dhe me mbështetjen kryesore të Agjencisë Kombëtare të Diasporës. Për herë të parë pas rënies së komunizmit në Shqipëri, në Londër u soll Ansambli Kombëtar i Këngëve dhe Valleve Popullore, institucioni më i lartë artistik shtetëror në fushën e trashëgimisë muzikore dhe skenike shqiptare.
Produksioni, i frymëzuar nga vepra "Childe Harold's Pilgrimage" e Lord Bajronit, e prezantoi Shqipërinë përmes këndvështrimit poetik të poetit britanik, duke përcjellë vlerat e lirisë, nderit, mikpritjes shqiptare dhe rolin e gruas shqiptare si shtyllë e familjes. Rolin e Lord Bajronit e interpretoi autori dhe aktori britaniko-kosovar Robert Wilton, duke udhëhequr publikun në një udhëtim artistik mes historisë, poezisë dhe kulturës shqiptare — një interpretim i cilësuar si një nga momentet më emocionuese të mbrëmjes.
Interpretimet muzikore të tenorit Aranit Hoxha dhe solistes Denisa Gjezo sollën këngë të fuqishme dhe emocionuese. Vallet dhe këngët tradicionale të Ansamblit krijuan një atmosferë të veçantë artistike, ndërsa publiku shqiptar dhe britanik e ndoqi çdo moment me vëmendje dhe duartrokitje të gjata.
Aktiviteti u pasurua edhe me një workshop të valleve popullore shqiptare, që ngjalli interes te shumë londinezë, të cilët u njohën nga afër me ritmet dhe traditat shqiptare. Një sfilatë e veçantë përfshiu 12 vajza shqiptare që jetojnë prej vitesh në Londër, të veshura me kostume tradicionale nga Tradita.AL, duke shfaqur larminë e veshjeve popullore nga treva të ndryshme shqiptare.
"Shqipëria përmes syve të Bajronit" u vlerësua si një urë e rëndësishme kulturore mes Shqipërisë dhe Mbretërisë së Bashkuar, duke promovuar identitetin shqiptar në arenën ndërkombëtare. Ngjarja la një mbresë të fortë tek publiku dhe shënoi një hap tjetër në afirmimin e trashëgimisë shqiptare.
Burimet: KultPlus dhe ATSH
— Redaksia ZHURMA
