Si do të lehtësohet tregtia midis Maqedonisë dhe Shqipërisë?
Protokolli i ri doganor synon uljen e kohës së pritjes dhe efikasitet më të madh në pikat kufitare të përbashkëta
QAFË THANË — Maqedonia e Veriut dhe Shqipëria kanë nënshkruar një protokoll të ri për bashkëpunim doganor, që synon lehtësimin e tregtisë dhe përshpejtimin e procedurave kufitare. Protokolli parashikon kontrolle më efikase, ulje të kohës së pritjes dhe qarkullim më të shpejtë të mallrave dhe udhëtarëve.
Drejtorët e dy administratave doganore, Boban Nikollovski dhe Besmir Beja, së bashku me përfaqësues të OSBE-së, kanë inspektuar pikën kufitare Qafë Thanë. Nikollovski ka theksuar se bashkëpunimi me Shqipërinë është forcuar, duke krijuar një partneritet të qëndrueshëm.
Beja ka vlerësuar se protokolli do të përmirësojë koordinimin e procedurave dhe shfrytëzimin e resurseve. Nga ana tjetër, OSBE ka vlerësuar këtë zhvillim si një hap të rëndësishëm për përmirësimin e sigurisë dhe menaxhimit të përbashkët kufitar.
Protokolli synon integrimin rajonal drejt Bashkimit Evropian, duke lehtësuar tregtinë dhe lëvizjen midis dy vendeve. Marrëveshja Shqipëri-Kosovë për mobilitetin në punë tregon se bashkëpunimet e tilla mund të sjellin përfitime konkrete.
Burim: TV21
— Redaksia ZHURMA