Shqiptarët paguan 80 mln euro më shumë për naftë, konsumi pothuajse i njëjtë
Nga marsi deri në korrik, shqiptarët shpenzuan rreth 80 milionë euro më shumë për karburante, për konsum pothuajse të njëjtë.
Shqipëria mbetet vendi i vetëm në Europë pa trena, dhe mungesa e transportit publik jashtë Tiranës e bën makinën një domosdoshmëri. Kështu, edhe kur nafta shtrenjtohet, konsumi nuk bie ndjeshëm.
Të dhënat e importeve për periudhën mars-korrik tregojnë se u importuan rreth 305.8 mijë tonë karburante, vetëm 1.2% më pak se një vit më parë. Rënia më e madhe u shënua në prill dhe maj, me 14.3% dhe 7.3% më pak, ndërsa në qershor dhe korrik importet u rritën me 4.6% dhe 6.9%, për shkak të sezonit turistik.
Megjithatë, fatura e shqiptarëve ishte shumë më e lartë. Sipas llogarive të “Monitor”, për sasitë e importuara u shpenzuan rreth 71.3 miliardë lekë, bazuar në çmimin mesatar mujor. Nëse çmimi do të kishte mbetur në nivelin e vitit të kaluar, rreth 175 lekë për litër, fatura do të ishte 63.7 miliardë lekë. Diferenca është rreth 7.6 miliardë lekë, ose afërsisht 80 milionë euro më shumë, vetëm për shkak të çmimit më të lartë.
Efekti ishte më i fortë në muajt me çmime të larta, si marsi, kur çmimi mesatar arriti në 198.4 lekë për litër.