BQE-ja fut Shqipërinë, Kosovën dhe Maqedoninë e Veriut te pagesat e shpejta

FRANKFURT — Shqipëria, Kosova dhe Maqedonia e Veriut pritet t’i bashkohen në nëntor platformës TIPS, sistemit të pagesave të shpejta. Presidentja e Bankës Qendrore Europiane, Christine Lagarde, e dha lajmin në një konferencë për shtyp në Frankfurt: “Pres me padurim një nisje të ngjashme në Shqipëri, Kosovë dhe Maqedoninë e Veriut, të cilat pritet t'i bashkohen platformës në nëntor, duke bërë që të gjitha vendet pjesëmarrëse në këtë nismë të jenë pjesë e saj”, tha ajo.

Me këtë sistem, transfertat e parave do të kryhen në kohë reale brenda pak sekondash, 24 orë në ditë dhe 7 ditë në javë. Përfitimet pritet të jenë të shumta, nga ulja e përdorimit të parasë fizike dhe kostove të transaksioneve, deri te rritja e përfshirjes financiare.

Burim: Shqiptarja, https://shqiptarja.com/lajm/shqiperia-kosova-dhe-maqedonia-e-veriut-pjese-e-sistemit-te-pagesave-te-shpejta-ne-nentor-perjashtohet-serbia — Redaksia ZHURMA