Si u shpëtuan dy turistët ukrainas në Ksamil?
Një skaf i marrë me qira nga dy turistë ukrainas rrezikoi të fundosej në Ksamil për shkak të motit të keq, duke nxitur ndërhyrjen e shpejtë të forcave Delta.
KSAMIL — Dy turistë ukrainas janë shpëtuar pasditen e së shtunës në detin e Ksamilit, pasi mjeti i tyre lundrues rrezikoi të fundosej për shkak të motit të keq. Përkeqësimi i papritur i kushteve atmosferike dhe erërat e forta krijuan dallgë të mëdha, duke bërë që skafi i marrë me qira nga turistët të humbte kontrollin dhe të mbushej me ujë.
Në ndihmë të tyre ndërhynë efektivët e Njësisë Speciale Delta, të cilët ndodheshin në patrullim në mbështetje të Komisariatit të Policisë Kufitare Sarandë. Ndërhyrja e shpejtë e forcave të policisë bëri të mundur nxjerrjen e dy turistëve të sigurt në breg, të cilët raportohet se janë në gjendje të mirë shëndetësore.
Ndërkohë, shërbimet policore po punojnë për të nxjerrë skafin e bllokuar nga uji. Policia Kufitare përsëriti thirrjen për kujdes të shtuar gjatë lundrimit në këtë sezon turistik, duke theksuar se efektivët mbeten në gatishmëri të plotë për të garantuar sigurinë e jetës së qytetarëve dhe vizitorëve.
Burim: ATSH
— Redaksia ZHURMA