Shala: Vonesat në gradimet e Policisë dëmtojnë sigurinë publike

Policia e Kosovës ka aktualisht 799 zyrtarë me gradën e rreshterit dhe 292 me gradën e togerit, ndërsa në të dyja këto grada vazhdojnë të mbeten pozita të lira. Ekspertët e sigurisë dhe ish-zyrtarët policorë kërkojnë përshpejtimin e procedurave të avancimit, duke paralajmëruar se vonesat dëmtojnë sigurinë publike dhe atë nacionale.

Për shkak të nevojave operative dhe menaxheriale në terren, disa pozita udhëheqëse në Polici po mbulohen nga zyrtarë me gradë më të ulët, të cilët shërbejnë në cilësinë e ushtruesve të detyrës. Kjo praktikë ka shtyrë njohësit e fushës të alarmojnë për krijimin e zbrazëtive në zinxhirin komandues dhe për dobësimin e llogaridhënies institucionale.

Eksperti i sigurisë, Drizan Shala, konsideron se rreshterët dhe togerët luajnë një rol kyç në strukturën organizative, sidomos në aspektet taktike dhe operative. Sipas Shalës, mungesa e një numri të madh të këtyre zyrtarëve bën që bartja e përgjegjësisë të mbetet minimale. Ai theksoi se rreshterët janë të parët që mbërrijnë në vendin e ngjarjes, ndërsa togerët udhëheqin stacionet dhe sektorët e hetimeve. Për më tepër, Shala kritikoi emërimin e ushtruesve të detyrës për periudha të gjata, duke e cilësuar këtë si neglizhencë menaxheriale dhe duke kërkuar nga Ministria e Punëve të Brendshme dhe udhëheqja e re që ta përmbyllin procesin sa më parë.

Nga ana tjetër, edhe ish-eprori i Policisë së Kosovës, Refki Morina, vlerëson se realizimi i gradimeve është i domosdoshëm për plotësimin e vendeve të lira të punës dhe për të garantuar funksionimin e duhur të stacioneve policore në të gjitha nivelet rajonale.

«Padyshim, ne do të duhet të analizojmë strukturën organizative të Policisë së Kosovës, ku dihet që në kuadër të saj baza kryesore e proceseve, të cilat garantojnë që mbarëvajtja e këtij organograme institucional janë rreshterët dhe togerët, të cilët luajnë një rol tejet të rëndësishëm sa i përket aspekteve operative, taktike në terren. Prandaj, mungesa e një numri të madh të rreshterëve dhe togerëve, do të thotë barteja e përgjegjësisë dhe llogaridhënia do të jetë minimale, sepse kemi vetëm ushtrues detyre të këtyre funksioneve të zyrtarëve të lartë të Policisë së Kosovës. Prandaj, ne do të duhet të mendojmë që Ministria e Punëve të Brendshme, respektivisht struktura e re udhëheqëse e Policisë së Kosovës, një proces të tillë ta përmbyllë sa më parë që është e mundur, për ta minimizuar në aspektin e krijimit të një vakumi këtij institucioni. Dihet që rreshterët janë të parët të cilët mblidhen në vendin e ngjarjes dhe janë përgjegjës për policët në terren. Kuptohet qartë ashtu si togerët janë pjesë udhëheqëse të një sektori apo të një stacioni, apo stacioneve policore, apo sektorëve të hetimeve dhe mungesa e gjithë këtyre e krijon këtë vakum, i cili është tejet i rëndësishëm sa i përket mbarëvajtjes së proceseve», tha Shala.

«Prandaj, çdo vonesë, çdo prolongim i mundshëm i këtij procesi determinon dhe afekton drejtpërdrejt çështje të sigurisë publike dhe asaj nacionale, sepse mekanizmi më pastaj krijon vakume të cilat e pengojnë rrjedhën e procesit, por njëkohësisht edhe lënien e marrjes së përgjegjësisë së duhur për punën dhe funksionet që zyrtarët policorë kanë», shtoi ai.

«Dihet që në Republikën e Kosovës është krijuar një kult që krijojmë ushtrues detyre me mandate të tëra, dhe pikërisht kjo mundësi e këtij ushtrimi të U.D.-së, pra vendosja në sektor, në udhëheqje, është një neglizhencë menaxheriale, është një neglizhencë e marrjes së përgjegjësisë, sepse përmes kësaj bartet apo shfaqet edhe dështimi, sepse udhëheqja e lartë e Policisë së Kosovës, në qoftë se ushtron apo mban funksione me U.D., atëherë barra dhe përgjegjësia do të mund të minimizohen dhe llogaridhënia do të mund të jetë minimale. Prandaj, ky sistem dhe ky modalitet i U.D.-ve do të duhet të largohet brenda sektorëve të sigurisë dhe mos të ekzistojë fare, pra në momentin që ka ndryshim, të ketë mandat të plotë, të ketë edhe në aspektin e llogaridhënies juridiksionin të jetë efektiv, efikas për të arritur rezultatet e duhura», potencoi Shala.