Sam Asghari: Lidhja me Britney Spears do të mbetet gjithmonë pjesë e historisë sime
Aktori dhe modeli Sam Asghari tashmë është i fokusuar te karriera e tij
LOS ANGELES — Aktori dhe modeli Sam Asghari po përpiqet të ndërtojë një identitet të ri në Hollywood, por pranon se lidhja e tij me Britney Spears-in do të mbetet gjithmonë pjesë e historisë së tij publike. Në një intervistë për Page Six, Asghari foli për periudhën gjashtëvjeçare pranë këngëtares dhe martesën e tyre që zgjati rreth dy vjet, deri në ndarjen e finalizuar në vitin 2024.
Ai tha se nuk pret që pyetjet për Britney Spears-in të zhduken ndonjëherë, edhe pse tashmë është i fokusuar te karriera e tij dhe projektet personale. Pas ndarjes, Asghari ka zgjedhur të qëndrojë larg zhurmës së medias dhe të përqendrohet te puna si aktor.
Asghari është në një lidhje me agjenten e pasurive të paluajtshme Brooke Irvine dhe jeton me të në Los Angeles. Ndërkohë, në karrierë Asghari po punon për të krijuar një emër jashtë lidhjes me Britney Spears-in. Ai është pjesë e filmit të ri “The Gentleman Thief”, ku luan krah aktorit John Travolta.
Marrëdhënien me këngëtaren ai e sheh si një periudhë që ka ndikuar në jetën e tij, pavarësisht vështirësive. “E kaluara është e kaluar. Nuk do të ankohem kurrë për diçka që ma ka ndryshuar jetën, qoftë për mirë apo për keq”, është shprehur ai.
Burim: IndeksOnline
— Redaksia ZHURMA