Sa të sakta janë rezultatet zgjedhore me 3.7% gabim në numërim?

PRISHTINË — Dy deputetë të Partisë Demokratike të Kosovës (PDK), Bekim Haxhiu dhe Qëndrin Kryeziu, kanë paraqitur ankesë në Gjykatën Supreme kundër vendimit të Panelit Zgjedhor për Ankesa dhe Parashtresa (PZAP), duke kërkuar rinumërim të votave.

Haxhiu dhe Kryeziu argumentojnë se ankesën e mbështesin fakte të reja, të cilat dëshmojnë parregullsi të mëdha në procesin e numërimit fillestar. Sipas tyre, raporti i Sekretariatit të Komisionit Qendror të Zgjedhjeve (KQZ) për procedurën e rinumërimit evidenton gabime që variojnë nga 6% deri në 25% në komuna të caktuara.

“Në total, si mesatare tek votat e PDK-së, ky gabim është 3.7% — një margjinë e madhe. KQZ-ja ka tentuar ta minimizojë këtë si gabim, por nëse llogaritet në të gjitha votat preferenciale të PDK-së, që janë mbi 1.47 milion, me një margjinë gabimi prej 1.4%, rezulton se mbi 20,600 vota preferenciale janë potencialisht të regjistruara gabimisht,” tha Haxhiu.

Ai theksoi se ligji kërkon certifikim të saktë të rezultatit zgjedhor, dhe asnjëherë nuk lejon certifikim me gabime të tilla. “Askund në ligj nuk shkruan që mund të certifikohet një rezultat zgjedhor me 1.4% gabime, e as me 25%. Rezultati duhet të jetë ashtu siç e ka dhënë votën qytetari,” shtoi ai.

Kryeziu, nga ana tjetër, theksoi se ankesa është plotësuar me prova shtesë, të cilat PZAP-ja nuk i ka marrë parasysh. “Nga 6.5% në Mitrovicën e Jugut, kemi deri në 25% ndryshim të votës. Nëse llogaritet në total të 725,000 votuesve, janë në pyetje 101,000 vota gabim. Vetëm për PDK-në, rreth 22-23 mijë vota janë në ndryshim,” tha Kryeziu.

Të dy kandidatët shpresojnë që Gjykata Supreme të shqyrtojë ankesën në mënyrë të pavarur dhe të urdhërojë rinumërimin. “Nuk mund të bëhesh deputet me votat e numëruesve, por duhet të bëhesh me votat e qytetarëve, ashtu siç i ka hedhur ditën e votimit,” tha Haxhiu.

Kjo ankesë vjen pasi KQZ-ja ka certifikuar rezultatet, pavarësisht nga raportet që tregojnë gabime të mëdha në numërim. PDK-ja kërkon transparencë dhe saktësi në procesin zgjedhor, duke theksuar se çdo gabim mund të ndikojë në përfaqësimin e qytetarëve.

Burim: Zëri
— Redaksia ZHURMA