Sa rrit Qeveria përfitime sociale me ribalancin e buxhetit?

SHKUP — Ribalanci i buxhetit për 2026 rrit shpenzimet për "përfitime sociale" me pothuajse 33 milionë euro, duke e çuar shumën e përgjithshme të këtij zëri në 2.598.300.000 euro. Zëri "subvencione dhe transfere" rritet me 10,4%, ose 50.217.000 euro më shumë, duke arritur në 532.306.428 euro.

Rritja e shpenzimeve shoqërore kalon kryesisht përmes dy fondeve më të mëdha të shtetit: Fondi për Sigurim Pensional dhe Invalidor (FSPI) dhe Fondi për Sigurime Shëndetësore (FSSh). Këta zëra prekin numrin më të madh të qytetarëve, përmes kompensimeve, pagesave sociale dhe shpenzimeve për shëndetësi, sipas analizës ekonomike të Portalb.mk.

Fondi për Sigurime Shëndetësore merr 20 milionë euro shtesë dhe arrin në pothuajse 908 milionë euro total. Zëri "përfitime sociale" brenda FSSh-së rritet me 15,64 milionë euro, duke e çuar shpenzimin vjetor për pagesa në 106.542.207 euro, ndërsa zëri "rroga dhe kompensime" arrin në 11,4 milionë euro.

Zëri "mallra dhe shërbime" i FSSh-së arrin në 790 milionë euro, pothuajse tërësisht i destinuar për "shërbime kontraktuese". Transferi nga buxheti qendror në llogarinë e FSSh-së rritet në pothuajse 128 milionë euro, ndërsa të hyrat nga kontributet për sigurim shëndetësor pritet të arrijnë në 826.244.000 euro.

Fondi për Sigurim Pensional dhe Invalidor rritet me vetëm 300.000 euro, duke arritur në 2.450.740.000 euro, ndërsa zëri "përfitime sociale" në këtë fond bie me 230.000 euro. FSPI-ja do të shpenzojë pothuajse 2.500.000.000 euro për pensione këtë vit, me transferin qendror të pandryshuar, në 1.019.773.000 euro.

Të hyrat e FSPI-së nga kontributet për sigurim social pritet të arrijnë në 1.396.000.000 euro, ose 27,6 milionë euro më shumë se plani aktual. Qeveria e lidh rritjen e shpenzimeve me politikat për rritje ekonomike të mbështetura nga konsumi: sipas dokumentit buxhetor, konsumi privat pritet të rritet 2,3%, ndërsa konsumi publik 2,5% në 2026.

Qeveria e mbron ribalancin si buxhet zhvillimor, ndërsa opozita e vlerëson si buxhet parazgjedhor. Sipas bllokut opozitar, tashmë po përgatitet një paketë amendamentesh ndaj ribalancit të propozuar për këtë vit. Ribalanci nis tani procedurën parlamentare, ku pritet debat mbi ritmin e rritjes së shpenzimeve shoqërore në një vit me spekulime për zgjedhje të parakohshme.

Burim: Portalb
— Redaksia ZHURMA