Vazhdon deri më 20 tetor masa e TVSH-së së ulur për naftën

Qeveria ka vendosur të vazhdojë zbatimin e masës për uljen e Tatimit mbi Vlerën e Shtuar për naftën nga 18 në 10 për qind, e cila do të mbetet në fuqi deri më 20 tetor. Lajmin e bëri të ditur ministrja e Financave, Gordana Dimitrieska-Koçoska, e cila theksoi se ky vendim merret me qëllim zbutjen e presioneve të çmimeve mbi amvisëritë dhe ekonominë, si dhe ruajtjen e stabilitetit ekonomik. Sipas njoftimit, masa zgjatet edhe për tetë ditë të tjera, pasi vazhdimi i fundit ishte paraparë deri më 12 tetor.

Ministrja e Financave shtoi se institucionet kompetente mbeten të përqendruara te lëvizjet në bursat globale dhe do të vazhdojnë t'i ndjekin me kujdes zhvillimet në tregjet ndërkombëtare, për të reaguar në kohë me masa që kontribuojnë në mbrojtjen e standardit të jetesës dhe stabilitetit ekonomik. Kjo masë synon të ndikojë në çmimet e karburanteve me pakicë dhe të zbusë presionet e jashtme të çmimeve, duke ulur kështu barrën financiare për qytetarët dhe bizneset.

Kjo masë u vendos për herë të parë më 14 shtator. Gjithashtu, nga prilli i këtij viti është në fuqi edhe masa për uljen e akcizës për naftën me 4 denarë dhe për benzinat me 2 denarë. Propozim-ribalanci i ri i Buxhetit, i cili u miratua nga Qeveria, është rezultat i ndikimit fiskal nga masat e ndërmarra për mbështetjen e qytetarëve dhe bizneseve përmes uljes së akcizës dhe TVSH-së për karburantet.