Fuqia blerëse e shqiptarëve ra me 170 euro që nga viti 2020
Fuqia blerëse ka humbur rreth 170 euro për gjashtë vjet
TIRANË — Rritja e pagave në Shqipëri vijoi trendin pozitiv në terma nominalë, por kur korrigjohet për inflacionin, paga reale për punonjësit mbetet dukshëm më e ulët. Me këtë ritëm, fuqia blerëse ka rënë rreth 170 euro për gjashtë vjet.
Pagat janë rritur në Shqipëri, por në raport me rritjen e çmimeve, nuk ka diferencë të theksuar. Të dhënat zyrtare të INSTAT tregojnë se këtë vit, paga mesatare mujore bruto arriti në 90,100 lekë, me rritje vjetore 9.6%.
Në pesë vite paga nominale u rrit me 60%. Por e njëjta pagë, e matur me fuqinë reale blerëse, rezultoi në tremujorin e parë të këtij viti 73,800 lekë me rritje vjetore 7 për qind. Hendeku ndërmjet pagës reale dhe asaj nominale arriti në 16,300 lekë më shumë se 170 euro në tremujorin e parë 2026, me një zgjerim rreth 23 % nga e njëjta periudhë e 2025.
Kjo do të thotë se me rreth 90 mijë lekë, një shqiptar blen sot të njëjtat mallra që në vitin 2020 i blinte me rreth 73,800 lekë. Diferenca mes pagës nominale dhe asaj reale ka ndjekur një trajektore rritëse. Në fillim të vitit 2021, hendeku ishte vetëm 1,220 lekë. Kjo diferencë u zgjerua ndjeshëm gjatë vitit 2022, duke kaluar mbi 6,600 lekë në fund të vitit, në një periudhë kur ekonomia u përball me rritje të fortë të çmimeve.
Burim: Euronews Albania — Redaksia ZHURMA