Rrëshqitjet e dheut vonojnë rrugën Izvor-Dibër, paralajmërohet tender
Kompania që kryen punimet në rrugën rajonale Kërçovë-Dibër ka hasur në vështirësi nga shembja e dheut.
Rruga rajonale Kërçovë-Dibër, konkretisht nga fshati Izvor i Kërçovës e deri në Urën e Dibrës, ende nuk ka përfunduar për shkak të vështirësive që ka hasur kompania me shembjen e dheut. Rruga është asfaltuar deri diku, por rrëshqitja e tokës e ka zënë rrugën në shumë vende dhe për hapjen e saj të plotë nevojitet vendosja e mureve anësore.
Ministri i Transportit, Aleksandar Nikolloski, ka siguruar se projekti do të përfundohet, ndërsa ka paralajmëruar se do të ketë një thirrje publike shtesë për t'u tenderuar punët që më parë nuk ishin paraparë. Sipas tij, projekti do ta shkurtojë ndjeshëm udhëtimin, duke shmangur nevojën për të udhëtuar nëpërmjet Mavrovës.
Sa i përket pretendimeve të aktivistëve mjedisorë për dëmtimin e burimeve të Lumit Treska në fshatin Izvor, Nikolloski ka hedhur poshtë akuzat duke deklaruar se është punuar në bazë të standardeve ekologjike dhe janë përpunuar rezervuarë specialë për ujë.
Rruga Kërçovë-Dibër është e gjatë 18.8 kilometra dhe ka një investim prej rreth 20 milionë eurosh. Punimet kishin nisur në vitin 2021 dhe ishin paraparë të përfundonin brenda 24 muajve.
Burimet: Tetova Sot; Zhurnal.mk; TV21 (klaster 3 outlets).