Sa do të jenë gjobat për shkeljet me trotineta elektrikë në Maqedoni?

— Maqedonia e Veriut po implementon rregulla më të ashpra për përdoruesit e trotineteve elektrikë, një hap që mirëpritet nga qytetarët për shkak të rrezikut të lartë të këtyre mjeteve. Ndryshimet ligjore ndalojnë përdorimin e tyre nga personat nën 18 vjeç, kufizojnë shpejtësinë në maksimum 20 kilometra në orë dhe ndalojnë transportin e dy personave në një mjet njëkohësisht.

Sipas ligjit të ri, trotinetet duhet të lëvizin në korsitë e biçikletave. Në rastet kur këto nuk ekzistojnë, lëvizja në trotuar lejohet vetëm deri në 6 km/h, gjë që në praktikë do të thotë që ngasësi duhet ta shtyjë mjetin. Gjithashtu, drejtuesit janë të detyruar të zbresin nga trotineti kur kalojnë rrugën në vijat e bardha.

Masat sanksionuese janë rritur ndjeshëm, ku gjobat bazë kalojnë nga 50 në 100 euro. Për ngasjen nën ndikim të alkoolit, gjoba është fikse 275 euro plus konfiskimi i mjetit. Ndërsa për prindërit që lejojnë fëmijë nën 18 vjeç të vozitin, gjoba është 225 euro dhe mjeti konfiskohet për 30 ditë.

Konfiskimi i përkohshëm i mjetit parashikohet edhe për rastet e tejkalimit të shpejtësisë, transportit të personave të tretë apo ngasjes pa duar dhe me një rrotë. Gjithashtu, ligji ndalon rreptësisht ngjitjen e trotineteve pas makinave në lëvizje, duke synuar reduktimin e incidenteve të rrezikshme në qytet.

Këto masa vijnë pas statistikave alarmante të prezantuara në Kuvend. Nga viti 2024 deri në maj të vitit 2026, janë regjistruar 2352 aksidente në trafik me mopedë, trotineta elektrikë dhe motoçikleta. Në këto ngjarje, 46 persona kanë humbur jetën dhe 585 janë lënduar rëndë.

Kritika më e madhe drejtohet faktit që më shumë se 70 për qind e aksidentuarve kanë qenë fëmijë të mitur. Qytetarët kërkojnë masa edhe më rigoroze, duke argumentuar se shpejtësia prej 20 km/h është ende shumë e lartë për sigurinë publike, duke sugjeruar kufizime deri në 6-7 km/h.

Burim: Alsat-M
— Redaksia ZHURMA