Rrahmani refuzon koalicionin me LVV-në — e quan qeverisje të dëmshme
Deputeti i PDK-së deklaroi se nuk do të bashkëpunojë me Lëvizjen Vetëvendosje
PRISHTINË — Deputeti i PDK-së, Eman Rrahmani, ka deklaruar se është kundër çdo bashkëpunimi qeverisës me Lëvizjen Vetëvendosje, duke e cilësuar qeverisjen e saj si të dëmshme për vendin. Rrahmani tha se përfshirja në një qeveri me LVV-në do të nënkuptonte pranimin e, siç u shpreh ai, “keqqeverisjes” së gjashtë viteve të fundit.
Rrahmani deklaroi se situata politike është jashtëzakonisht e rëndë, institucionet nuk po funksionojnë si duhet dhe vendi po shkon drejt autoritarizmit. Ai u shpreh gjithashtu se çdo subjekt opozitar që do të pranonte një marrëveshje me LVV-në vetëm për postin e presidentit do të dilte humbës politikisht.
“Posti i presidentit nuk duhet të shihet si bazë për koalicion. Nëse partitë duan bashkëqeverisje, atëherë duhet të jenë pjesë e ekzekutivit. Çdo pranim i një marrëveshjeje vetëm për zgjedhjen e presidentit është humbje për partitë opozitare. Mendoj se nuk duhet të ketë asnjë lloj bashkëpunimi me pushtetin”, tha Rrahmani për RTV21.
Burim: Zëri — Redaksia ZHURMA