IKD nis peticionin në Prizren — kërkohet ndalimi i parasë publike në fushata
Instituti i Kosovës për Drejtësi po mbledh nënshkrimet deri më 31 korrik, në Sheshin Shadërvan, pas aktivitetit të ngjashëm në Prishtinë.
PRIZREN — Instituti i Kosovës për Drejtësi (IKD) nisi sot në Prizren mbledhjen e nënshkrimeve për nismën legjislative qytetare që kërkon ndryshimin e Kodit Penal. Nisma propozon që përdorimi i parasë publike për përfitim elektoral gjatë periudhave zgjedhore e parazgjedhore të ndalohet me ligj.
Propozimi parashikon edhe që moszbatimi i qëllimshëm i vendimeve të Gjykatës Kushtetuese të konsiderohet vepër penale. Sipas IKD-së, aktiviteti i paradites u karakterizua nga interesim i madh i qytetarëve, të cilët u informuan për përmbajtjen e nismës dhe e mbështetën me nënshkrimet e tyre.
Mbështetje për nismën kanë dhënë kryetari i Komunës së Prizrenit, Shaqir Totaj, drejtorë të drejtorive komunale, anëtarë të Kuvendit Komunal, si dhe qytetarë të shumtë të Prizrenit. Mbledhja e nënshkrimeve vazhdon edhe nesër, më 31 korrik, nga ora 10:00 deri në orën 15:00, në Sheshin Shadërvan.
Përmes kësaj nisme, qytetarët e Prizrenit i bashkohen thirrjes së IKD-së për forcimin e sundimit të ligjit dhe mbrojtjen e integritetit të procesit zgjedhor.
Burim: Demokracia
— Redaksia ZHURMA