Si do të përfitojë Shkupi nga nisma 'Roaming si në shtëpi' me BE-në?
Ministri Stefan Andonovski përfaqësoi vendin në takimin ministror me Komisionin Evropian kushtuar zbatimit të regjimit të ri të tarifave të roamingut.
SHKUP — Ministri i Transformimit Dixhital, Stefan Andonovski, mori pjesë në një takim ministror përmes videokonferencës me Komisionin Evropian dhe ministrat e Ballkanit Perëndimor. Ky takim iu kushtua kornizës negociuese dhe hapave të ardhshëm për zbatim të nismës së përbashkët "Roaming si në shtëpi".
Sipas ministrisë, qëllimi i këtij regjimi është të mundësojë përdorimin e shërbimeve celulare në Bashkimin Evropian me të njëjtat tarifa si në vendlindje. Andonovski theksoi se ky proces përbën një prioritet me përparësi maksimale për Qeverinë e Maqedonisë dhe për dikasterin që ai udhëheq.
Ministri shtoi se nisma nuk shihet thjesht si një harmonizim rregullator, por si një përfitim i prekshëm për studentët, bizneset dhe turistët. Strategjikisht, ky hap e afron Maqedoninë me tregun e vetëm dixhital të Bashkimit Evropian, duke ulur barrierat dhe duke lehtësuar shkëmbimin ekonomik.
Në funksion të këtij integrimi, Ministria e Transformimit Dixhital ka hartuar një Plan Veprimi gjithëpërfshirës në gusht të vitit 2025. Ky plan përcakton përgjegjësitë institucionale dhe afatet për përshtatjen e kornizës kombëtare me rregullat e Bashkimit Evropian në fushën e roamingut dhe komunikimeve elektronike.
Burim: Almakos
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.