Kur rriten çmimet e konsumit në Kosovë?
Inflacioni vjetor arrin në 6 për qind në qershor, ndikuar nga shtrenjtimi i transportit dhe strehimit
Agjencia e Statistikave të Kosovës (ASK) ka publikuar Indeksin e Harmonizuar të Çmimeve të Konsumit (IHÇK) për muajin qershor 2026, sipas të cilit inflacioni vjetor në Kosovë ka arritur në 6 për qind, ndërsa në baza mujore është shënuar një rënie prej 0.1 për qind.
Sipas ASK-së, publikimi është bërë duke zbatuar klasifikimin e ri COICOP 2018, me vit bazë 2025 = 100 dhe metodologji të përditësuar. Krahasuar me qershorin e vitit 2025, rritja e çmimeve është ndikuar kryesisht nga shtrenjtimi i transportit me 13.7 për qind, i grupit të strehimit, ujit, energjisë elektrike, gazit dhe lëndëve të tjera djegëse me 11.1 për qind, pijeve alkoolike, duhanit dhe narkotikëve me 5.1 për qind, restoranteve dhe shërbimeve të akomodimit me 4.5 për qind, si dhe shëndetësisë me 4.1 për qind.
Po ashtu, ASK ka regjistruar rritje të çmimeve edhe te ushqimet dhe pijet joalkoolike me 3.9 për qind, kujdesi personal, mbrojtja sociale dhe mallrat e shërbimet e ndryshme me 3.2 për qind, mobiliet, pajisjet shtëpiake dhe mirëmbajtja rutinore e shtëpisë me 3 për qind, veshjet dhe këpucët me 2.3 për qind, rekreacioni, sporti dhe kultura me 2 për qind, si dhe informacioni dhe komunikimi me 0.2 për qind.
Çmimet e konsumit janë rritur në qershorin e këtij vitit krahasuar me qershorin e vitit të kaluar. Sipas Agjencisë së Statistikave Indeksi i tërësishëm i çmimeve të konsumit ishte më i lartë në një mesatare prej 6,0 % në muajin qershor 2026, krahasuar me muajin qershor 2025.
Burim: Telegrafi, https://telegrafi.com/ask-inflacioni-vjetor-ne-kosove-arriti-ne-6-per-qind-ne-qershor/
— Redaksia ZHURMA