Parandalohet futja e pakos me narkotikë në Burgun e Dubravës

Shërbimi Korrektues i Kosovës ka njoftuar se është parandaluar futja e kontrabandës në Qendrën Korrektuese në Dubravë, pasi gjatë kontrolleve të rregullta të sigurisë është gjetur një pako e dyshimtë. Sipas njoftimit të institucionit, pakoja u gjet rreth orës 02:35 brenda perimetrit të institucionit korrektues, ndërsa ekziston dyshimi se e njëjta është hedhur nga jashtë.

Në njoftimin e lëshuar për media thuhet se pas kontrollit dhe matjes, pesha e lëndës së dyshuar narkotike, së bashku me mbështjellësin, ka rezultuar të jetë 87 gramë. Autoritetet kompetente kanë vepruar menjëherë për të trajtuar situatën e krijuar brenda hapësirave të burgut.

Institucioni ka njoftuar se lidhur me këtë rast është vënë në dijeni Policia e Kosovës, e cila do të vazhdojë me trajtimin e mëtejshëm të rastit në përputhje me procedurat përkatëse ligjore. Shërbimi Korrektues i Kosovës ka theksuar se do të vazhdojë të zbatojë kontrolle të rregullta dhe masa të shtuara të sigurisë me qëllim të parandalimit të çdo forme të kontrabandës dhe garantimit të sigurisë së plotë në të gjitha institucionet korrektuese të vendit.