Rriten çmimet e prodhimeve bujqësore në Kosovë
Agjencia e Statistikave të Kosovës publikon indeksin e çmimeve për tremujorin e tretë të vitit 2026.
Redaksia ZHURMA · · 1 min lexim
Sektori i bujqësisë në Kosovë ka shënuar rritje çmimesh gjatë tremujorit të tretë të vitit 2026, krahasuar me të njëjtën periudhë të vitit paraprak. Sipas raportit të Agjencisë së Statistikave të Kosovës përmes Indeksit të Çmimeve të Prodhimeve dhe Çmimeve në Bujqësi për TM3, treguesi i përgjithshëm ka regjistruar një ngritje prej 1.4 për qind.
Sipas të dhënave zyrtare, shtrenjtimi ka përfshirë të dy sektorët kryesorë të kësaj fushe. Çmimet e prodhimeve bimore u rritën për 0.8 për qind, ndërsa ato blegtorale shënuan një ngritje më të lartë prej 3.1 për qind. Kategoria e bimëve përfshin drithërat, perimet, patatet, pemët dhe bimët foragjere, kurse ajo blegtorale përfshin kafshët dhe produktet e tyre.
Për llogaritjen e treguesve në blegtori janë marrë parasysh katër kategori kafshësh të vlerësuara në peshë të gjallë, përkatësisht gjedhet, delet, derrat dhe pulat, si dhe produktet si qumështi, vezët dhe mjalti. Mbledhja e informacioneve është kryer në tregje, ferma dhe pika grumbullimi, ku çmimet janë regjistruar në euro përmes njësive matëse si kilogrami, litri dhe copa.
