Si e justifikon Rashiq sulmet e Listës Serbe ndaj tij?

PRISHTINË — Kryetari i Partisë Progresive Demokratike, Nenad Rashiq, ka akuzuar Listën Serbe dhe strukturat e mbështetura nga Beogradi për presione politike, ekonomike dhe personale ndaj kundërshtarëve politikë në komunitetin serb të Kosovës.

Rashiq tha se ka përfaqësuar një politikë të moderuar dhe evropiane, që synon integrimin e komunitetit serb brenda institucioneve të Kosovës. "Kam dashur t'i reprezantoj të gjithë ata për një politikë të moderuar, moderne, evropiane", deklaroi ai, duke shtuar se sfidat kanë qenë të vazhdueshme që nga krijimi i strukturës së mbështetur nga Beogradi.

Ai pretendoi se presionet shtrihen edhe në sferën personale e familjare. "Jo vetëm nga aspekti politik, por edhe personal, individual e familjar, sepse ato struktura nuk dinë asgjë tjetër përveçse të bëjnë presion dhe të veprojnë në mënyrë të dhunshme. Kemi pasur raste të largimit nga puna, ndërprerjes së kontratave", tha Rashiq.

Në theks të veçantë ai vuri kushtëzimin e qytetarëve që përfitojnë nga skemat sociale në Serbi. Sipas tij, përfituesit thirren grup pas grupi në Merdare, Vranjë ose Rashkë, ku u kërkohet të votojnë për Listën Serbe — përndryshe u ndalohet hyrja në Serbi dhe u humbasin beneficionet.

Rashiq u shpreh se gjatë javëve të fundit situata është përkeqësuar. "Është e njëjta histori, por tash edhe më brutale", tha ai, duke shtuar se "95 për qind e njerëzve mendojnë njëjtë sikur unë" kur nuk ka fushatë zgjedhore, por gjatë zgjedhjeve aktivizohen të gjithë mekanizmat e presionit — nga deklaratat e presidentit serb e shefit të Zyrës për Kosovë deri te aparati medial.

Ai raportoi një rast të fundit: "Vetëm dje kemi pasur një rast ku një nga bashkëpunëtorët e mi ka qenë i ndaluar rreth 12 orë në kufi, me marrje në pyetje, shantazhe dhe maltretime". Rashiq shtoi se vokabulari i Listës Serbe ndaj tij është sikur të ishte "njeriu më i keq i mundshëm".

Burim: Zëri
— Redaksia ZHURMA