Rama: E pabesueshme si e kupton një gjykatës pavarësinë e pushtetit gjyqësor
Kryeministri Edi Rama reagoi në platformën X për debatin mbi pagat e gjyqtarëve, duke komentuar një deklaratë të gjyqtarit Engert Pëllumbi.
Kryeministri Edi Rama ka reaguar në rrjetin social X lidhur me debatin për pagat e gjyqtarëve, duke komentuar një deklaratë të gjyqtarit Engert Pëllumbi. Rama shpërndau një pjesë të deklaratës, ku Pëllumbi thotë se gjyqësori ka buxhetin e vet dhe nuk po merr fonde nga buxhetet e institucioneve të tjera.
“Ne kemi qesen tonë të buxhetit. Nuk po marrim nga qeset e të tjerëve. Me pak fjalë, nuk po na lejohet të marrim nga qesja jonë”, citohet të ketë thënë Pëllumbi. Rama shkruan se është “e pabesueshme, po e vërtetë” mënyra se si një gjykatës e kupton pavarësinë e pushtetit gjyqësor dhe e sheh buxhetin e shtetit shqiptar.
Reagimi vjen në kuadër të debatit për pagat e magjistratëve dhe përplasjes mes qeverisë dhe sistemit të drejtësisë. Kuvendi pritet të shqyrtojë më 17 shtator zgjidhjen ligjore për pagat e gjyqësorit.