Qeveria ndan 1.4 milionë euro për ringjalljen ekonomike
Raporti gjashtëmujor financiar i buxhetit për vitin 2026: 1 miliard e 816.52 milionë euro të hyra
PRISHTINË — Qeveria në detyrë e Republikës së Kosovës ka zhvilluar mbledhje elektronike, në të cilën ka marrë disa vendime. Qeveria miratoi Raportin Gjashtëmujor Financiar të Buxhetit të Republikës së Kosovës për vitin 2026. Ky raport përmban një përmbledhje të trendeve kryesore të të hyrave dhe shpenzimeve buxhetore përgjatë periudhës së këtij gjashtëmujori të vitit 2026.
Sipas kumtesës së Qeverisë, pranimet buxhetore kanë arritur në 1 miliard e 816.52 milionë euro, ndërsa shpenzimet buxhetore kanë qenë 1 miliard e 777.50 milionë euro. Po ashtu, Qeveria ka ndarë 21,000 euro për realizimin e shfaqjes “Taverna Mirësia – Mario, Bella, Anastasia”, me regji të Mario Banushit.
Një tjetër vendim i miratuar është ndarja e 1,400,000 eurove për zbatimin e Masës 3.8 të Pakos së Ringjalljes Ekonomike, e cila synon mbështetjen e aktiviteteve ekonomike dhe lehtësimin e ndikimit të sfidave ekonomike. Burim: Gazeta Dukagjini, https://www.dukagjini.com/qeveria-ne-detyre-miraton-raportin-financiar-gjashtemujor-dhe-ndan-1-4-milion-euro-per-pakon-e-ringjalljes-ekonomike/
— Redaksia ZHURMA