Martin Freeman u martua fshehurazi me partneren e tij Rachel Benaissa

Aktori britanik Martin Freeman është martuar fshehurazi me partneren e tij prej gjashtë vitesh, aktoren dhe skenaristen franceze Rachel Benaissa. Zëdhënësi i aktorit konfirmoi lajmin për gazetën britanike The Sun, pasi unazat e tyre tërhoqën vëmendjen në premierën e filmit A Long Winter gjatë Festivalit të Filmit në Londër të mërkurën në mbrëmje.

Lajmi për kurorëzimin e tyre erdhi pasi çifti u shfaq së bashku në tapetin e kuq, ku Freeman luan në filmin e ri. Rachel Benaissa, e cila është 21 vjet më e re se aktori, mbante në dorë një unazë fejese me smerald si dhe një unazë ari me dy diamante. Nga ana tjetër, Freeman mbante gjithashtu një unazë martese prej ari, gjë që nxiti menjëherë spekulimet për një martesë të mundshme mes tyre.

Pas kësaj paraqitjeje publike, zëdhënësi i aktorit konfirmoi zyrtarisht se çifti ishte martuar në fillim të këtij viti, ndërsa detajet e tjera rreth ceremonisë martesore nuk u bënë të ditura. Para se të niste lidhjen me Benaissën, aktori i njohur për rolet e tij në serialin Sherlock dhe në trilogjinë Hobbit kishte qenë në një lidhje 16-vjeçare me aktoren Amanda Abbington, me të cilën ka luajtur gjithashtu në serialin Sherlock.

Edhe pse aktori flet rrallë për jetën e tij private, ai kishte ndarë më parë disa detaje për partneren e tij gjatë një paraqitjeje në podkastin Table Manners. Freeman tha se ajo nuk është ndonjë shefe kuzhine e shkëlqyer, por është e çmendur pas djathit dhe verës. Aktori shtoi gjithashtu se edhe vetë Rachel e përshkruan veten në të njëjtën mënyrë dhe se të dyve u pëlqen të gatuajnë së bashku.