Pse Vinicius bëhej 'i çmendur' vetëm brenda fushës?
'Cacau' zbuloi Viniciusin dhe tregon: brenda fushës 'i çmendte kundërshtarët', jashtë saj nuk fliste fare.
MADRID — Eduardo Abrantes, i njohur si "Cacau" — skauteri që e zbuloi Vinicius Junior — ka rrëfyer para Corriere della Sera si e njohu talentin e sulmuesit brazilian që kur ishte fëmijë. Sipas tij, Vinicius ishte jashtëzakonisht i turpshëm jashtë fushës, por ndryshonte plotësisht sapo fillonte ndeshja.
"Ishte shumë i vogël dhe tepër i turpshëm. Nuk fliste shumë, por kur hynte në fushë, i çmendte kundërshtarët. Driblimet dhe shpejtësia e tij ishin të jashtëzakonshme," tha Cacau. Ai shtoi se talenti i Viniciusit ishte i dukshëm që në vitet e para dhe se të gjithë besonin se ai do t'i arrinte majat e futbollit botëror.
"Kishte diçka ndryshe nga të tjerët dhe ishte e qartë se mund ta ndërtonte një karrierë të madhe," shtoi skauteri. Sot Vinicius është njëri nga yjet kryesorë të futbollit botëror dhe një nga liderët e Brazilit në Kupën e Botës 2026 — pikërisht siç e parashikonin trajnerët e tij që në fillimet e karrierës.
Burim: Gazeta Express
— Redaksia ZHURMA