Pse konstituimi i Kuvendit nuk mund të zgjasë mbi 30 ditë?
Ish-gjyqtari Kadri Kryeziu paralajmëron se tejkalimi i këtij afati kushtetues pas certifikimit të zgjedhjeve e dërgon automatikisht vendin në zgjedhje të reja.
PRISHTINË — Ish-gjyqtari i Gjykatës Kushtetuese, Kadri Kryeziu, ka bërë të qartë se Kuvendi i Kosovës nuk mund të zvarritet pa afat. Ai sqaroi se procesi i konstituimit duhet të përfundojë brenda 30 ditëve, duke filluar nga momenti kur certifikohen rezultatet.
Detyra e parë i takon u.d. presidentes së vendit. Sapo Komisioni Qendror i Zgjedhjeve të përfundojë numërimin dhe të kryejë certifikimin e votave, ajo ka obligim kushtetues të thërrasë seancën e parë konstituive brenda këtij afati prej 30 ditësh.
Sipas Kryeziut, ekziston një vendim i mëhershëm i Gjykatës Kushtetuese që nuk lejon hapësirë për interpretime të tjera apo vonesa politike. Ai vlerësoi se i gjithë procesi zgjedhor i administruar nga KQZ-ja është zhvilluar sipas standardeve evropiane.
Nëse ky afat shkelet dhe deputetët dështojnë të konstituojnë Kuvendin, pasojat janë të prera. Kosova do të detyrohet të shkojë menjëherë në zgjedhje të reja të parakohshme, duke rikthyer procesin në pikën zero.
Burim: Ekonomia Online
— Redaksia ZHURMA
