Pse kërkon Armend Zemaj bllokimin e solucionit Ringer në QKUK?
Ish-ministri i Shëndetësisë publikoi një mesazh urgjent që po qarkullon te stafi mjekësor për ndalimin e distribuimit të një serie të këtij solucioni.
PRISHTINË — Ish-ministri i Shëndetësisë, Armend Zemaj, ka ngritur shqetësime të mëdha për cilësinë e barnave në sistemin publik. Ai ka publikuar një mesazh urgjent që po qarkullon në stafin shëndetësor për ndalimin e distribuimit të solucionit Ringer 500ml, për shkak të dyshimeve të forta mbi sigurinë e tij.
Në mesazhin e brendshëm që u bë publik, kërkohet tërheqja e menjëhershme nga repartet e serisë me numër 1252149 dhe afat skadence deri në prill të vitit 2028. Sipas deputetit të LDK-së, kjo situatë dëshmon një nivel shqetësues të degradimit dhe keqmenaxhimit në QKUK dhe në spitalet rajonale.
Zemaj ka hedhur akuza direkte ndaj Ministrisë së Shëndetësisë nën udhëheqjen e Arben Vitisë dhe Komitetit Ekzekutiv të kryeministrit Albin Kurti. Ai pretendon se korrupsioni dhe interesat e grupeve të caktuara farmaceutike kanë ndikuar drejtpërdrejt në furnizimin me barna të pasigurta për pacientët kosovarë.
Ish-ministri theksoi se mungesa e mbikëqyrjes parlamentare ka krijuar hapësirë për tenderë njëburimorë dhe çmime të stërfryera. Kjo nuk është hera e parë që ngrihen dyshime të ngjashme; kohë më parë u raportua për raste kur bllokohen njësi të produkteve medicinale në spitalet tona për arsye sigurie.
Për t'u garantuar siguria e pacientëve dhe integriteti i sistemit, Zemaj ka kërkuar një hetim të plotë dhe të pavarur nga institucionet përgjegjëse. Sipas tij, kjo situatë kërkon me urgjencë ndarjen e përgjegjësisë dhe ndalimin e menjëhershëm të praktikave abuzive me shëndetin publik.
Burim: IndeksOnline
— Redaksia ZHURMA
