Pse është shqetësuese gjendja në Serbi sipas Tonino Piculës?

BRUKSEL — Gjendja në Serbi është bërë shqetësuese, me rritje të dhunës dhe polarizim të theksuar politik, sipas Tonino Piculës, raportuesit të Parlamentit Evropian (PE) për Serbinë. Në një podcast, Picula ka vënë në dukje se situata parazgjedhore, e shkaktuar nga deklaratat e presidentit Aleksandar Vuçiq për dorëheqje, do të çojë në një periudhë edhe më të vështirë.

„Serbia ndodhet në një gjendje të pashpallur të jashtëzakonshme tash e një vit e gjysmë, që nga shembja e strehës në stacionin hekurudhor të Novi Sadit, ku humbën jetën 16 persona“, ka thënë Picula. Ai ka paralajmëruar se pritet një polarizim i mëtejshëm dhe një përpjekje për dominim nga ana e partisë në pushtet dhe të Vuçiqit.

Picula ka theksuar se po punohet sistematikisht për dobësimin e institucioneve demokratike, ndërsa Serbia ka mbetur prapa në të drejtat themelore. „Forcohet narrativë që nuk shkon në favor të Bashkimit Evropian. Nëse dikush do ta ndiqte situatën politike në Serbi, nuk do të ishte i sigurt nëse bëhet fjalë për një vend kandidat për BE apo për një shtet që po përgatitet të nënshkruajë marrëveshje me Rusinë e Putinit“, ka shtuar ai.

Në prag të seancës plenare të PE-së, ku do të prezantohet Raporti për Serbinë, Picula ka vlerësuar se Serbia është bërë edhe më e polarizuar, me dobësim të kapaciteteve demokratike. Ai ka theksuar se në draft-raportin e këtij viti janë paraqitur mbi 500 amendamente, krahasuar me rreth 300 vitin e kaluar, gjë që dëshmon rritjen e interesimit për gjendjen në Serbi.

„Vuçiq, në tubimin e fundit në Beograd, mbajti një fjalim tipik parazgjedhor, ndonëse zgjedhjet ende nuk janë shpallur. Ai foli si kandidat për kryeministër, duke u premtuar mbështetësve të tij një Serbi më të fortë ushtarakisht“, ka thënë Picula. Ai ka kritikuar edhe manipulimet e autoriteteve serbe rreth përdorimit të mjeteve të ndaluara gjatë protestës së 15 marsit 2025, ku PE kishte kërkuar një hetim të pavarur.

Burim: Illyria
— Redaksia ZHURMA