Pse burrat shqiptarë duan të punojnë deri në 67.4 vjeç, më shumë se kudo në Europë?

TIRANË — Burrat shqiptarë dëshirojnë të punojnë deri në moshën 67.4 vjeç, duke vendosur një rekord absolut në Europë, sipas Anketës Europiane të Kushteve të Punës (EWCS 2024).

Kjo shifër i lë mbrapa vende me standarde shumë më të larta jetese, si Danimarka (66.5 vjeç), Norvegjia (65.9) dhe Holanda (65.5). Në rajon, Kosova (65), Serbia (63.7) dhe Mali i Zi (61.7) kanë pritshmëri të dukshme më të ulëta — shqiptarët zgjasin karrierën gati 6 vjet më shumë se malazezët.

Raporti thekson se mosha e preferuar e pensionit nuk lidhet vetëm me aftësinë fizike, por edhe me nevojën ekonomike. Në Shqipëri, ku pensioni mesatar arrin vetëm 20 mijë lekë (rreth 100 euro), 55% e pensionistëve marrin pagesa të pjesshme, pasi nuk plotësojnë vitet e punës.

Të dhënat e INSTAT tregojnë se numri i pensionistëve që vazhdojnë të punojnë ka rritur me 10 mijë në 2025, duke arritur në 130 mijë persona — 12% e të punësuarve të moshës 15-64 vjeç. Kjo tregon se vendet bosh të punës po i plotësojnë pensionistët, jo të rinjtë, të cilët vazhdojnë të emigrojnë.

Gratë shqiptare gjithashtu preferojnë të dalin vonë në pension, mesatarisht në moshën 63.5 vjeç, duke u renditur ndër vendet e para në Europë. Megjithatë, ndryshe nga burrat, ato nuk mbajnë vendin e parë — Norvegjia (65.5), Danimarka (65.4) dhe Suedia (65.3) i kalojnë.

EWCS mat tre tregues kryesorë: moshën e dëshiruar, moshën ligjore dhe moshën aktuale të daljes në pension. Shqipëria dallohet për kontrastin midis moshës së lartë të dëshiruar (67.4) dhe nivelit të ulët të pensionit (20 mijë lekë), që reflekton pasigurinë financiare të popullsisë.

Rreth 68% e të anketuarve dhanë një moshë konkrete për pension, ndërsa 21% shprehën dëshirën për të punuar «sa më gjatë të jetë e mundur». Kjo tregon se për shumë shqiptarë, punësimi i zgjatur nuk është një zgjedhje, por një nevojë.

Burim: Monitor
— Redaksia ZHURMA