Çfarë shqetësimi ngriti Afrim Hoti për trashëgiminë arkeologjike të Durrësit?

DURRËS — Libri shkencor “Kërkime Arkeologjike” i arkeologut Afrim Hoti u promovua në ambientet e jashtme të Muzeut Arkeologjik të Durrësit, me pjesëmarrjen e specialistëve të fushës. Botimi përmbledh 16 artikuj shkencorë që trajtojnë periudhat antike dhe mesjetare, me fokus të veçantë në Durrësin arkeologjik.

Hoti sqaroi se libri i përket kolanës së botuar me rastin e përvjetorit të arkeologëve të njohur dhe hedh dritë mbi aktivitetin kërkimor-shkencor në Durrës gjatë viteve 1980-2000. “Nëntoka e Durrësit është një rezervat i madh”, nënvizoi ai, duke shtuar se qyteti përfshihet në trashëgiminë botërore mesdhetare të UNESCO-s që nga viti 1989, bashkë me Apoloninë.

Studiuesi ngriti shqetësimin se, pavarësisht ekzistencës së ligjeve për mbrojtjen e trashëgimisë kulturore, gjatë ndërtimeve vijojnë të evidentohen shkelje që dëmtojnë pasurinë arkeologjike të qytetit. “Privatizimi i tokës dhe kujdesi jo i mjaftueshëm i organeve të pushtetit qendror dhe lokal, edhe pse ka ligje dhe dispozita që e mbrojnë, shpesh sjellin shkelje”, theksoi Hoti. Sipas tij, mesazhi kryesor i librit është ndërgjegjësimi për ruajtjen e trashëgimisë arkeologjike dhe nevoja që zhvillimi urban të mos dëmtojë historinë e qytetit. “Ky libër është një mesazh për të gjithë, jo vetëm për organet e pushtetit, që të tregojnë më shumë kujdes dhe të zbatojnë kërkesat që ka ligji për trashëgiminë kulturore”, vijoi ai.

Burim: Zëri
— Redaksia ZHURMA