Shqipëria, Greqia dhe Maqedonia e Veriut nisin rrugën drejt UNESCO-s

Shqipëria, Greqia dhe Maqedonia e Veriut kanë nisur zyrtarisht përgatitjet për kandidaturën e përbashkët të rajonit të Prespës për përfshirjen në Listën e Trashëgimisë Botërore të UNESCO-s. Takimi trepalësh dhe nënshkrumi i deklaratës përkatëse u mbajtën në komunën greke të Prespës, ku morën pjesë ministrat e resorteve përkatëse nga të tria shtetet fqinje. Ky proces i përbashkët synon ruajtjen e vlerave natyrore, historike e kulturore, si dhe zhvillimin e turizmit të qëndrueshëm në këtë zonë ndërkufitare.

Ministri i Turizmit, Kulturës dhe Sportit i Shqipërisë, Blendi Gonxhja, ministrja e Kulturës e Greqisë, Lina Mendoni, dhe ministri i Kulturës dhe Turizmit i Maqedonisë së Veriut, Sedat Sulejmani, bashkuan forcat në këtë nismë. Sipas deklaratave të dhëna gjatë takimit, rajoni i Prespës përfaqëson një peizazh unik natyror dhe kulturor me vlerë të jashtëzakonshme, i cili historikisht ka qenë një tërësi e vetme. Përgjegjësia për ruajtjen e kësaj pasurie mbetet e përbashkët dhe kërkon një bashkëpunim të vazhdueshëm ndërmjet vendeve.

Ministri Sedat Sulejmani theksoi rëndësinë e këtij angazhimi për menaxhimin afatgjatë dhe të qëndrueshëm të Prespës, me përfitime konkrete për komunitetet lokale që jetojnë aty. Ai u shpreh se bashkimi i njohurive, përvojave dhe vullnetit të mirë ndërton një bashkëpunim të fortë që mbron trashëgiminë dhe hap mundësi të reja zhvillimi për rajonin. Nga ana e tij, ministri Blendi Gonxhja u shpreh se Bashkimi Europian do të vërë në dispozicion dy milionë euro për hartimin e studimit të fizibilitetit për këtë kandidaturë treshtetërore.

Gonxhja shtoi gjithashtu se në pjesën shqiptare janë ndërmarrë disa hapa të rëndësishëm, duke përfshirë restaurimin e pikturave murale në Kishën e Shën Marisë në Maligrad, ndriçimin e kishës dhe të shtegut, si dhe Shtëpinë Muze të Sterjo Spasses në Gollomboç, të cilat kanë pasuruar ofertën kulturore dhe turistike të zonës. Po kështu, projekti i financuar nga BE bashkon institucione nga të tre vendet për konservimin, digjitalizimin dhe promovimin e vlerave të Prespës së Madhe e të Vogël.

Në këtë ngjarje morën pjesë edhe personalitete të tjera të rëndësishme, përfshirë ambasadorin dhe shefin e Delegacionit të BE-së në Shkup, Mihalis Rokas, drejtuesin e zyrës së UNESCO-s në Sarajevë pranë Byrosë Rajonale të UNESCO-s në Venecia, Sinisa Sesum, koordinatorin e përhershëm të OKB-së në Maqedoninë e Veriut, Rita Columbia, si dhe përfaqësues të vetëqeverisjeve lokale dhe institucioneve nga të tre vendet. Palët shprehën bindjen se përpjekjet e përbashkëta për mbrojtjen dhe njohjen e Prespës do të shërbejnë si shembull i shkëlqyer i bashkëpunimit konstruktiv rajonal dhe i rolit që luan trashëgimia e përbashkët si urë lidhëse mes popujve fqinjë.