Prokuroria e Tiranës hap tri hetime për dhunën policore

TIRANË — Prokuroria e Tiranës ka regjistruar tri procedime penale lidhur me dëmtimet e shkaktuara protestuesve gjatë javës së fundit, mirëpo ende nuk ka asnjë punonjës policie të regjistruar si person nën hetim. Të dhënat e bëra me dije nga prokuroria konfirmojnë se hetimet po kryhen për veprën penale të kryerjes së veprimeve arbitrare, ndërkohë që prokurorët i kanë deleguar policisë gjyqësore veprimet për identifikimin e efektivëve.

Lëvizjet protestuese në kryeqytet u nisën fillimisht nga studentët dhe më pas gjetën mbështetje te gjimnazistët. Pjesëmarrësit u ngritën në demonstrata nga pakënaqësia ndaj korrupsionit, kostoja e lartë e jetesës dhe mungesa e perspektivës. Tubimet në terren u shoqëruan me përplasje të dhunshme mes palëve si dhe dëmtime të pronës.

Sipas të dhënave që organet e akuzës i dërguan BIRN-it, një nga rasteve të hetimit lidhet me plagosjen e shtetasit L.B. në protestën e 13 tetorit, ku nga dhuna e ushtruar prej policisë atij iu thye kocka e njërës këmbë dhe iu desh t'i nënshtrohej ndërhyrjes kirurgjikale të nesërmen. Hetimi i dytë i përket protestës së 16 tetorit para Ministrisë së Arsimit, ku një efektiv e shtyu me mburojë të riun M.S. teksa ai qëndronte pa kryer asnjë veprim, duke e përplasur në trotuar e duke i shkaktuar dëmtime serioze. Rasti i tretë është regjistruar kryesisht nga prokuroria mbi bazën e pamjeve në rrjete sociale e media, që pasqyrojnë episode të përdorimit jo proporcional të forcës.

Nga ana tjetër, shifrat zyrtare të Policisë së Shtetit tregojnë se gjatë protestave në Tiranë dhe qarqe të tjera janë arrestuar 300 persona, mes të cilëve 33 të mitur, ndërsa 559 persona janë proceduar penalisht, përfshirë 171 të mitur. Nga 859 të proceduarit në total, një e katërta përbëhet nga të mitur. Avokati i Popullit dhe organizatat për të drejtat e njeriut kanë dokumentuar pretendime për dëmtime fizike, dhunë nga policët dhe shkelje të garancive ligjore për mbrojtjen e fëmijëve.

Në kuadër të hetimit, prokurorët synojnë grumbullimin e provave dhe identifikimin e personave përgjegjës. Prokuroria njoftoi po ashtu se pranë saj kanë mbërritur edhe referime nga Agjencia e Mbikëqyrjes Policore për veprime të tjera të kryera nga punonjësit e Policisë së Shtetit.

Lidhur me verifikimet në terren, organet e akuzës deklaruan: «Nga ana Prokurorisë po kryhen veprime në Spitalin Universitar të Traumës lidhur me personat e dëmtuar gjatë protestës, të cilët po marrin trajtim mjekësor në spital, me qëllim sqarimin e rrethanave të ngjarjes dhe dokumentin e çdo rasti».