Prokuroria e Romës hap hetim për rrjetin e Epstein, kërkon dokumente sekrete nga SHBA

Prokuroria e Romës ka hapur zyrtarisht një hetim mbi të ashtuquajturat „Dosjet Epstein“, me dyshimin për vepra të lidhura me dhunën seksuale, abuzimin dhe trafikimin. Hetimi, i koordinuar nga zëvendësprokurori Maurizio Arcuri, synon të verifikojë nëse shtetas italianë ose persona që kanë vepruar në territorin italian mund të jenë përfshirë në episoda me natyrë seksuale, sipas juridiksionit italian.

Autoritetet italiane i kanë dërguar Departamentit amerikan të Drejtësisë një kërkesë zyrtare për të marrë dokumentacionin mbi çështjen, përfshirë edhe materiale që nuk janë bërë ende publike. Në fokus janë referencat për vendet si Capri, Bregu Amalfitan, Costa Smeralda, Milano dhe Roma, të evidentuara në dokumentet e publikuara.

Hetimi ka nisur pas kallëzimit të depozituar më 26 mars nga rrjeti i qendrave kundër dhunës „Differenza Donna“, i cili kërkoi verifikime për krime të mundshme transnacionale. Italia bëhet kështu një nga vendeve evropiane që shqyrtojnë lidhjet me rrjetin e Epstein, pas hetimeve të raporteuara në Francë, Norvegji, Poloni dhe Mbretërinë e Bashkuar.

Në dokumentet amerikane përmenden „incidente të përsëritura që përfshijnë individë italianë“, megjithëse prokuroria thekson se përmendja e një personi nuk përbën vetëprovë kriminale. Biznesmeni italian Lapo Elkann ka pranuar se është takuar dy herë me Epstein, por ka mohuar çdo përfshirje në veprimtari të paligjshme.