Pse një profesoreshë në Shtip u ndalua të ligjërojë pas marrjes së ryshfetit?

SHTIP — Profesoreshës së Universitetit "Goce Dellçev" në Shtip, e cila dyshohet se kërkoi dhe mori ryshfet nga një student për t’i dhënë notë kaluese, i është ndaluar ushtrimi i detyrës në fakultet.

Prokuroria Themelore Publike në Shtip njoftoi se prokurori ka kërkuar nga gjyqtari i procedurës paraprake përcaktimin e masave paraprake, duke përfshirë arrest shtëpiak, detyrim për paraqitje në gjykatë, sekuestrim të dokumentit të udhëtimit, si dhe ndalim për kontakt me studentin dhe për kryerjen e aktiviteteve pune në fakultet.

Hetimi zbuloi se më 16 qershor, pasi studenti nuk tregoi njohuri të mjaftueshme për të kaluar provimin, profesoresha nuk shënoi notën në indeks, por kërkoi 300 euro për t’i dhënë notën kaluese. Më 29 qershor, në zyrën e saj, ajo mori paratë nga studenti, duke i udhëzuar t’i linte në tavolinë, dhe më pas shënoi notën kaluese në indeks.

E dyshuara, një 38-vjeçare nga Koçani, është person me interes publik, pasi punon si docente në universitet. Prokuroria ka nisur procedurën hetimore për marrje ryshfeti. Ky rast pason një ngjarje të ngjashme në Shtip, ku një profesore tjetër u kap për ryshfet ndaj një studenteje.

Burim: Tetova Sot
— Redaksia ZHURMA