Prenga sfidon Anthony Joshuan — 20 fitore, të gjitha me nokaut

PRISHTINË — Boksieri shqiptar Kristian Prenga do të përballet me ish-kampionin e botës në peshat e rënda, Anthony Joshua, në një nga sfidat më të mëdha të karrierës së tij. Prenga ka një bilanc prej 20 fitoresh dhe 1 humbjeje, me të gjitha 20 fitoret e arritura me nokaut.

"U shtanga kur më telefonoi dhe më tha se kisha një mundësi për të luftuar me Joshuan," ka thënë Prenga për revistën The Ring. Ai i kishte thënë menaxherit se do të përballej me çdo kundërshtar, por se një duel me rrezik të lartë duhet të vijë me shpërblim — qoftë në para, qoftë në mundësinë që një luftë e tillë krijon.

Anthony Joshua, britanik 36-vjeçar, është kampion olimpik i Londrës 2012 dhe dy herë kampion i unifikuar i botës në peshat e rënda. Dueli me Prengën shihet si përgatitje për Joshuan drejt një dueli të mundshëm me Tyson Furyn, por shqiptari synon ta shfrytëzojë mundësinë për të hyrë në skenën më të madhe të boksit botëror.

"Jam një goditës i fuqishëm dhe mund të lëndoj çdo kundërshtar. Nuk i frikësohem asnjë njeriu dhe kjo ka shumë rëndësi në ring," ka deklaruar Prenga, duke shtuar se fuqia, madhësia fizike dhe atletizmi janë armët e tij kryesore. "Pasi ta nokautoj Joshuan, do të renditem më lart dhe do të bëhem më i njohur në boks," ka thënë ai.

Burim: RTV21
— Redaksia ZHURMA