Pranga francezit në Sarandë për mashtrim me "Postën Shqiptare"
Operacioni "Posta e Rreme 2" goditi skemën që vidhte të dhëna bankare përmes faqeve të rreme dhe SMS-ve mashtruese.
SARANDË — Policia e Shtetit finalizoi operacionin e koduar "Posta e Rreme 2", duke goditur një skemë mashtrimi kompjuterik që operonte përmes faqeve të falsifikuara të Postës Shqiptare. Në bashkëpunim me Komisariatin e Policisë Sarandë, Strukturat për Hetimin e Krimeve Kibernetike arrestuan shtetasin francez Z. K., 22 vjeç, ndërsa shpalli në kërkim shtetasin gjerman T. M., 53 vjeç, si bashkëpunëtor të dyshuar.
Shtetasit e huaj kishin krijuar faqe interneti që imitonin zyrtaren e Postës Shqiptare, dërguan SMS me linqe mashtruese dhe synonin të vidhnin të dhëna personale e bankare të qytetarëve shqiptarë për përfitim të paligjshëm monetar. Gjatë operacionit u sekuestruan celularë, karta SIM, karta bankare dhe dokumente të tjera të dyshuara.
Materialet iu referuan Prokurorisë pranë Gjykatës së Shkallës së Parë Sarandë për veprën penale "Falsifikimi kompjuterik". Policia apelon qytetarët të mos klikojnë linqe të dyshimta, të verifikojnë adresat zyrtare të institucioneve dhe të raportojnë çdo rast mashtrimi.
Burim: Telegrafi
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.