Policia gjobit mërgimtarin që u ngjit mbi trotuar me makinë në Pejë

PEJË — Policia e Kosovës identifikoi dhe gjobiti drejtuesin e një automjeti të tipit Mercedes, me targa të Gjermanisë, pasi u filmua duke kryer kundërvajtje në komunikacion në rrugën “Besnik Lajqi” në Pejë. Video u publikua më 25 korrik në rrjetin social Facebook.

Në pamjet e publikuara shihej vetura duke tejkaluar kolonën e automjeteve nga krahu i djathtë, për t’u ngjitur më pas mbi trotuar, para se të rikthehej sërish në shiritin rrugor. Pas publikimit, njësia e trafikut për qytetin e Pejës ndërmori veprimet e nevojshme dhe arriti ta identifikojë shoferin.

Atij i është shqiptuar gjobë për kundërvajtjen e kryer. Policia bëri të ditur se, me pëlqimin e shoferit, vlera e gjobës u dyfishua, në përputhje me Ligjin Nr. 08/L-186 për Rregullat e Komunikacionit Rrugor — në vend të ndalimit tremujor të drejtimit, pasi shoferi zotëron patentë të huaj.

Burim: Klan Kosova
— Redaksia ZHURMA